Granvin er ein av dei 7 Hardangerkommunane, der fjord, fjell og vakker natur er felles kjenneteikn. Vår og sommar er fruktbløming, fiske og fjordsegling, hytte- og stølsliv. Haust og vinter set du farten litt ned – tek turen på fjellet, til fots eller på ski. Skitrekket, ljosløyper og utforbakkar finn du både i Granvin og nabokommunane.
Granvin er lett å koma til med båt eller bil. Granvinfjorden går heilt til sentrum, til det gamle trafikk-knutepunktet på Eide. Du kan lett velja mellom fleire reiseruter. Riksveg 7 (Eventyrvegen) frå Oslo til Bergen og Riksveg 13 (Fjordvegen) frå Stavanger til Trondheim går båe gjennom Granvin. Det er 25 minuttar å køyre til Voss og Ulvik og om lag 2 timar til Bergen.
Granvin er ein god og trygg stad å vera, både for eldre og yngre. Miljø, kultur og trivsel står i sentrum. Dei gamle byggeskikkane vert tekne vare på. Det spirer og gror i song- og musikklivet. Hardingfela er symbolet i heradsvåpenet! Det er lett å gjera seg kjend i Granvin. Innbyggjartalet er om lag 980 og flatevidda 212 km2.
Bygda har normalt vore tufta på skog- og jordbruk som næringsveg. Dette er grunnlaget for seinare års industriutvikling. Turisme har frå gamalt vore viktig næringsveg i Granvin.
